नेपाली जनसम्पर्क समिति दक्षिण कोरियाको आगामी सातौं अधिवेशनलाई भव्य, सभ्य तथा व्यवस्थित रूपमा सम्पन्न गर्ने उद्देश्यले आयोजित तयारी बैठक सम्पन्न भएको छ।
आगामी १२ जुलाई २०२६ मा आयोजना हुने अधिवेशनलाई सफल बनाउन बसेको बैठकमा कार्यक्रम व्यवस्थापन, अतिथि स्वागत, प्रतिनिधि समन्वय, प्रचार–प्रसार, स्वयंसेवक परिचालन, मञ्च व्यवस्थापन तथा अन्य प्राविधिक पक्षका विषयमा विस्तृत छलफल गरिएको थियो। बैठकले अधिवेशनलाई प्रभावकारी रूपमा सम्पन्न गर्न विभिन्न कार्यक्षेत्रका जिम्मेवारीसमेत बाँडफाँट गरेको जनाएको छ।
बैठकमा समितिका सल्लाहकार, पूर्वपदाधिकारी, पदाधिकारी, सदस्य तथा युवा प्रतिनिधिहरूको उल्लेखनीय सहभागिता रहेको थियो। सहभागीहरूले अधिवेशनलाई नेपाली जनसम्पर्क समितिको गरिमा अनुरूप सफल बनाउन आवश्यक सुझाव प्रस्तुत गर्दै सबै पक्षबीच समन्वय र सहकार्यलाई थप मजबुत बनाउने प्रतिबद्धता व्यक्त गरेका थिए।
बैठकको समापन गर्दै नेपाली जनसम्पर्क समिति दक्षिण कोरियाका सभापति भजिन्द्र क्षेत्रीले तयारी बैठक सफल बनाउन योगदान पुर्याउने सम्पूर्ण अग्रज, सल्लाहकार, पदाधिकारी, सदस्य तथा स्वयंसेवकहरूप्रति हार्दिक आभार व्यक्त गर्नुभयो। उहाँले अधिवेशनलाई संस्थाको एकता, लोकतान्त्रिक मूल्य–मान्यता र संगठन सुदृढीकरणको महत्वपूर्ण अवसरका रूपमा उपयोग गर्न सबैलाई आ–आफ्नो जिम्मेवारी इमानदारीपूर्वक निर्वाह गर्न आग्रह गर्नुभयो।
सभापति क्षेत्रीले सबैको सक्रिय सहभागिता, आपसी विश्वास र सहकार्यले १२ जुलाईको सातौं अधिवेशनलाई ऐतिहासिक, भव्य र सफल बनाउने विश्वास व्यक्त गर्नुभयो।
