दक्षिण कोरियामा नेपाली युवकको ज्यान लिने दुर्घटना: ओखलढुंगाका थापा मृत अवस्थामा फेला

समाचार

गृहपृष्ठ
समाचार

दक्षिण कोरियामा नेपाली युवकको ज्यान लिने दुर्घटना: ओखलढुंगाका थापा मृत अवस्थामा फेला

नयाँ दैनिकी सोमबार, जेठ १८, २०८३

दक्षिण कोरियाको पोछन क्षेत्रमा कार्यरत एक नेपाली युवाको दुर्घटनामा परी निधन छ। ओखलढुंगा घर भएका गणेश थापाको कार्यस्थल फर्किने क्रममा भएको दुर्घटनामा ज्यान गएको प्रारम्भिक जानकारी प्राप्त भएको छ।

प्राप्त विवरणअनुसार थापा करिब तीन वर्षदेखि दक्षिण कोरियामा कृषि क्षेत्रमा कार्यरत थिए। उनी कार्यरत गाई फार्म दुर्गम तथा मानव बस्तीबाट टाढा रहेको बताइएको छ। दैनिक कामका सिलसिलामा फार्ममा आवश्यक सामग्री ओसारपसार गर्न प्रयोग गरिने सानो सवारी साधन लिएर उनी बजार गएका थिए।

जानकारीअनुसार बजारबाट फार्मतर्फ फर्किने क्रममा उक्त सवारी साधन अनियन्त्रित भई पल्टिएको र त्यसैको चपेटामा पर्दा उनको घटनास्थलमै ज्यान गएको हुन सक्ने प्रारम्भिक अनुमान गरिएको छ। यद्यपि घटनाको वास्तविक कारणबारे सम्बन्धित निकायले थप अनुसन्धान गरिरहेको बताइएको छ।

घटना शुक्रबार नै भएको भए पनि थापा कार्यस्थलमा एक्ला नेपाली कामदार रहेका र फार्म अत्यन्त विकट क्षेत्रमा अवस्थित भएकाले उनको खोजी तथा उद्धार कार्यमा ढिलाइ भएको स्रोतले जनाएको छ। नियमित सम्पर्क हुन नसकेपछि खोजी सुरु गरिएको र उनी शनिबार मात्रै फेला परेको जानकारी प्राप्त भएको छ।

मृतक थापाको शव व्यवस्थापन, कानुनी प्रक्रिया तथा नेपाल पठाउने सम्बन्धमा आवश्यक समन्वय भइरहेको बुझिएको छ। यस दुःखद घडीमा विभिन्न संघसंस्था, नेपाली समुदाय तथा शुभेच्छुकहरूले शोकाकुल परिवारप्रति गहिरो समवेदना व्यक्त गरेका छन्।

प्रकाशित मिति: सोमबार, जेठ १८, २०८३ १९:२६

प्रतिक्रिया दिनुहोस्