सौलमा सेतीमादीको सांगीतिक गुञ्जन: ‘स्टेज किङ’ दुर्गेश थापा र सिम्रन परियार कोरिया आइपुगे

समाचार

गृहपृष्ठ
समाचार

सौलमा सेतीमादीको सांगीतिक गुञ्जन: ‘स्टेज किङ’ दुर्गेश थापा र सिम्रन परियार कोरिया आइपुगे

नयाँ दैनिकी शनिबार, फागुन २, २०८२

दक्षिण कोरियामा रहेका नेपालीहरूका लागि बहुप्रतीक्षित सांगीतिक उत्सव ‘सेतीमादी सांगीतिक सौगात -भाग २’ लिएर ‘स्टेज किङ’का रूपमा परिचित लोकप्रिय गायक दुर्गेश थापा र सुमधुर स्वरकी धनी गायिका सिम्रन परियार दक्षिण कोरिया आइपुगेका छन्। प्रवासमा रहेका नेपाली मनहरूलाई एउटै सुरमा बाँध्ने यो विशेष कार्यक्रम आगामी फेब्रुअरी १६ मा राजधानी सौलमा मा भव्य रूपमा आयोजना हुँदैछ।

मञ्चमा उत्रिँदा दर्शकलाई नचाउन र झुमाउन सक्ने अद्भुत क्षमता भएकै कारण ‘स्टेज किङ’को उपनाम पाएका दुर्गेश थापाले पछिल्लो समय आफ्नो सुपरहिट गीत "दुश्मन हेरेको हेरै" मार्फत व्यापक चर्चा बटुलेका छन्। उक्त गीतले सामाजिक सञ्जालदेखि सार्वजनिक कार्यक्रमहरूसम्म उच्च लोकप्रियता हासिल गर्दै युवापुस्तामाझ विशेष क्रेज सिर्जना गरेको छ। सौलको मञ्चमा यही गीतसहित उनका चर्चित प्रस्तुतिहरूले माहोल तताउने अपेक्षा गरिएको छ।

तनहुँ समाज दक्षिण कोरियाको आयोजनामा हुन लागेको यस सांगीतिक साँझले ‘आपसी सहयोग, सद्भाव र एकता’को सन्देश प्रवाह गर्दै प्रवासी नेपालीबीच आत्मीयता सुदृढ गर्ने लक्ष्य राखेको छ। कार्यक्रममा नेपालबाट आमन्त्रित मुख्य कलाकारद्वयका साथै कोरियामा सक्रिय अन्य नेपाली कलाकारहरूको समेत आकर्षक प्रस्तुति रहने आयोजकले जनाएको छ।

लोक, आधुनिक तथा चर्चित हिट गीतहरूको संगमसँगै सौलमा सेतीमादीको सांगीतिक गुञ्जन घन्किने तयारी पूरा भएको छ।