गैरआवासीय नेपाली संघको एकता अभियान कोरियाबाट सुरु हुँदै

समाचार

गृहपृष्ठ
समाचार

गैरआवासीय नेपाली संघको एकता अभियान कोरियाबाट सुरु हुँदै

नयाँ दैनिकी मंगलबार, पुस २२, २०८२

अशेक मैनाली,सोल। गैरआवासीय नेपाली संघ (एनआरएनए) भित्र देखिएको लामो समयदेखिको विभाजन अन्त्य गरी संगठनलाई एकीकृत, सबल र सक्षम बनाउने उद्देश्यसहित एकता अभियान दक्षिण कोरियाबाट सुरु हुन लागेको छ। राष्ट्रिय समन्वय परिषद् कोरिया (एनसीसी कोरिया) को पहलमा सुरु हुन लागेको यस अभियानलाई विश्वव्यापी एकताको महत्वपूर्ण कदमका रूपमा हेरिएको छ।

एकता अभियानको महत्वपूर्ण यात्राका लागि गैरआवासीय नेपाली संघ अन्तर्राष्ट्रिय समन्वय परिषद् (आईसीसी) का उपाध्यक्ष डा. हेमराज शर्मा को कोरिया आगमनलाई विशेष अर्थपूर्ण मानिएको छ। उहाँलाई कोरियामा हार्दिक स्वागत गर्दै, विगतका तिता–मिठा अनुभवलाई भुलेर साझा उद्देश्यका साथ अघि बढ्न सबै पक्ष प्रतिबद्ध रहेको जनाइएको छ।

यस ऐतिहासिक कार्यक्रममार्फत गैरआवासीय नेपाली संघ भित्र देखिएको फुटको पीडालाई बिर्सेर एकताको खुसी साटासाट गर्ने तथा कोरियाबाट प्राप्त अनुभव, सेवा, सीप, प्रविधि र लगानी जन्मभूमि नेपाल भित्र्याउने दृढ संकल्प व्यक्त गरिने अपेक्षा गरिएको छ। विश्वभर छरिएर रहेका गैरआवासीय नेपालीहरू एकताबद्ध भएर अघि बढेमा नेपालमा सकारात्मक परिवर्तन सम्भव हुने सशक्त सन्देश यस अभियानले प्रवाह गर्ने विश्वास लिइएको छ।

कार्यक्रममा कोरियास्थित दुवै संघका अध्यक्षहरू, सम्पूर्ण पदाधिकारीहरू, पूर्व कार्यसमितिका अध्यक्ष तथा पदाधिकारीहरू, विभिन्न समयमा राष्ट्रिय तथा अन्तर्राष्ट्रिय समन्वय परिषद्मा प्रतिनिधित्व गरेका व्यक्तित्वहरू तथा कोरियामा एनआरएनए अभियानमा सक्रिय सम्पूर्ण अभियन्ताहरूको गरिमामय उपस्थिति रहने अपेक्षा गरिएको छ।

एकता अभियानलाई सफल बनाउन सबै गैरआवासीय नेपालीहरूलाई व्यक्तिगत स्वार्थभन्दा माथि उठी संगठनको साझा हितका लागि एकताबद्ध भई अघि बढ्न आह्वान गरिएको पुर्व अध्यक्ष तथा संरक्षक विनोद कुवंरले बताएका छन्।

प्रकाशित मिति: मंगलबार, पुस २२, २०८२ ०९:०४